Лука Дончиќ уште еднаш ја покажа својата големина откако на свој сонародник му исполни голема желба да го гледа во живо во дресот на Лејкерс.
Млад Словенец со своето семејство деновиве заминал на одмор во Лос Анџелес и во планот бил заеднички да проследат натпревар на 17-кратниот НБА шампион. Купиле карти за мечот против Милвоки, а во Крипто арената – разочарување. Во тимот на Лејкерс не беше ни Дончиќ, но ни Леброн Џејмс, Остин Ривс, Руи Хачимура, Џеред Вандербилт… Капак на се, натпреварот беше еднонасочна улица и Бакс славеа со 118-89, без никаква драматика. Одличниот настап на Брони Џејмс кој оствари личен рекорд е слаба утеха за младиот Словенец.
Незадоволен од авантурата, Патрик Зрнко на својот Твитер профил ги повикал Лејкерс на некој начин да му се оддолжат за она што го доживеа.
We came all the way from Slovenia, bought tickets for 1000€ and Luka, Lebron, Austin, Rui, Vando didn’t play🥹 @Lakers could you provide us with something for the next game against Bulls?🙏🏻🙏🏻 @luka7doncic @KingJames @rui_8mura @iamgabevincent2 @JVando @LakersReporter pic.twitter.com/zvHZwUMT0w
— Patrik Zrnko (@PatrikZrnko1) March 21, 2025
„Дојдовме од Словенија, плативме 1.000 долари за билети, а Лука, Леброн, Остин, Рус и Вандо не играа. Лејкерс, можете ли да ни помогнете некако за следниот натпревар против Булс?“, напиша Зрнко со емотикони со кои ја моли франшизата од Лос Анџелес.
И тука во приказната влегува Дончиќ кој преку својата фондација ЛД77 на своите сонародници им обезбеди три билети за вечерашниот дуел против Чикаго Булс. Лејкерс повторно нема да бидат комплетни бидејќи Леброн уште е во аут поради повреда, но ќе игра Дончиќ, како и Ривс и Вандербилт.
„Останав без зборови. Лука го прочитал мојот твит и ми испрати три билети. ЛД77 Фондација, благодарам многу, а на сите фанови на Лејкерс, им благодарам што го ретвитнаа мојот твит“, напиша Зрнко кого вечерва го очекува уште едно возбудување во Лос Анџелес.
Со евентуална победа против Чикаго, Лејкерс имаат шанса да се зацврстат на третото место на Западот и да го продолжат притисокот врз второпласираниот Хјустон.


