Македонскиот стручњак Емил Рајковиќ на фантастичен начин го почна својот престој во Турција откако вечерва со својот нов тим Тофаш го победи европскиот шампион Фенербахче на домашен терен со 80-78.
Триумфот не можеше да биде остварен подраматичен бидејќи тимот од Бурса го постигна кошот за победа буквално со истекот на времето. Херој беше Максвел Луис кому тоа му беше прв кош на натпреварот.
Победата на Тофаш дополнително добива на значење ако се знае дека во последната четвртина Фенербахче водеше и со седум поени разлика (74-67), а во последните две минути беше во предност од еден посед и имаше напад за победа. Рајковиќ има огромна заслуга за победа бидејќи на околу една секунда пред крајот, при резултат 78-78 повика тајмаут, ја нацрта акцијата која неговите кошаркари потоа ја спроведоа во дело и дојдоа до победата.
Литванскиот репрезентативец Блажевич со 21 поен беше најефикасен кај Тофаш, додека прв стрелец на мечот беше Хортон Такер од Фенербахче со 24.


