Екипата на Сан Антонио Спарс направи едно од најголемите изненадувања во сезоната, победувајќи ја Оклахома Сити во Лас Вегас, со што ја прекинаа импресивната серија од 16 победи на Тандер.
Тоа е само втор пораз на актуелниот шампион во НБА оваа сезона, но исто така е победа што им отвори врата на Спарс до финалето на НБА Купот, каде што ќе се соочат со Њујорк Никс. Натпреварот заврши со тесна победа од 111-109, иако почетокот не сугерираше таков епилог. Оклахома моќно влезе во натпреварот, во првата четвртина имаше двоцифрена предност и изгледаше како тим со целосна контрола над играта и резултатот. Сепак, како што одминуваше натпреварот, Сан Антонио го пронајде својот ритам, ја стабилизираше својата одбрана и постепено ја намалуваше разликата.
Пресвртните моменти се случија во третата четвртина, кога тимот од Тексас поведе за првпат. Финалето донесе вистински трилер, со чести промени на резултатот, но Спарс покажаа поголема смиреност во клучните моменти и обезбедија место во финалето.
Девин Весел беше најефикасен во победничкиот тим со 23 поени, додека Виктор Вембанјама, Стефон Касл и Дирон Фокс имаа значаен придонес, завршувајќи го натпреварот со по 22 поени. Од друга страна, Оклахома најмногу зависеше од актуелниот МВП на НБА, Шаи Гилџус-Александар, кој постигна 29 поени, додека Џејлен Вилијамс и Чет Холмгрен додадоа по 17. Финалето ќе биде голема можност за Виктор Вембанјама да дојде до првиот трофеј во НБА.
За него, Сан Антонио ќе се бори со Њујорк кој во првото полувреме го победи Орландо со 132-120. Блескаше Џејлен Брансон со 40 поени, а голема помош имаше во Карл Ентони Таунс кој реализира 29.


