Македонската кадетска репрезентација успешно го почна настапот на Европското првенство, а селекторот Дејан Стојановски порача дека првата задача е исполнета, но вистинската цел допрва следува.
По триумфот против Кипар, „црвено-жолтите“ продолжуваат со максимална посветеност, а селекторот нагласува дека тимот мора да остане фокусиран и да не се опушта и покрај поволната ситуација.
„Го направивме првиот чекор, но тоа не значи дека сме завршиле работа. Пред нас е уште многу работа и мора да продолжиме во ист ритам. Целта е да стигнеме до пласманот што го посакуваме, односно да се пласираме во нокаут сегментот“, порача Стојановски.
Тој смета дека во кошарката нема однапред добиени натпревари и дека секој противник мора да биде максимално сериозно сфатен.
„Во кошарката одамна нема лесни противници. Можеби на хартија некои работи изгледаат поинаку, но на терен мора да го покажеме квалитетот. Треба да одиме чекор по чекор“, истакна предводникот на кадетската селекција.
Селекторот потенцира дека голема улога ќе има и фактот што селекторот ќе може да смета на покомплетен состав.
„Најважно е сите да бидеме здрави и да бидеме комплетни. Кога селекторот ги има сите играчи на располагање, тогаш имаме поголеми можности да ја оствариме целта. Имаме амбиција да направиме уште еден чекор напред. Знаеме дека патот нема да биде лесен, но веруваме во тимот и во нашите можности. Сега целиот фокус е на дуелот со Исланд“, заврши Стојановски.
Вториот натпревар, Македонија го игра денеска од 18:30 часот, а евентуална победа, со оглед на вчерашните резултати, широко ќе ни ја отвори вратата кон четвртфиналето.


