АБА-лигата доживеа неочекувана промена во раководната структура. Милија Војиновиќ, кој неодамна доби безрезервна поддршка да продолжи да ја извршува функцијата директор на регионалното натпреварување, сепак се повлекува од позицијата.
Според информациите, Војиновиќ во иднина ќе работи во Војводина, каде што треба да преземе нова функција во новосадскиот клуб.
Неговото заминување доаѓа како изненадување, особено затоа што на неодамнешната седница на Собранието на АБА-лигата доби поддршка за продолжување на мандатот. Сепак, Војиновиќ решил да направи промена и да го продолжи својот ангажман на клупско ниво.
Овој потег се поврзува и со најавената соработка меѓу Војводина и Дубаи. Новосадскиот клуб и евролигашот од Обединетите Арапски Емирати веќе подолг период се поврзуваат со потенцијален проект кој би можел да донесе дополнителен развој и амбиции во Војводина.
Со заминувањето на Војиновиќ, АБА-лигата сега ќе мора да бара нов спортски директор. Регионалното натпреварување веќе има отворени конкурси за неколку важни позиции, меѓу кои комесар на натпреварувањето, претседател на судиската комисија и дисциплински судија.
Така, во период кога АБА-лигата се подготвува за новата сезона и продолжува со проширувањето и организациските промени, регионалното натпреварување останува без човекот кој досега ја извршуваше директорската функција.


