Кошаркарскиот клуб Работнички со нова енергија и високи амбиции влегува во новата натпреварувачка кампања.
На клупата повторно ќе биде Владимир Мирковски, кој ја започнува својата 24. сезона како тренер, а втора на кормилото на сениорскиот тим на најтрофејниот клуб во македонското кошаркарско првенство.
Работнички зад себе има 15 титули, а новата управа и стручниот штаб најавуваат враќање на клубот во самиот врв на македонската кошарка.
„Имаме нова управа, нова енергија и заедничка цел – да го вратиме Работнички таму каде што му е местото – на ВРВОТ!“, вели Мирковски на почетокот на подготовките за новата сезона.
Искусниот стратег се осврна и на периодот зад екипата, нагласувајќи дека турбулентната мината сезона донела и позитивни работи, пред сè во однос на карактерот и компактноста на тимот.
„Минатата сезона беше турбулентна, но нè направи единствени. Го задржавме костурот на тимот, донесовме неколку засилувања на дефицитарните позиции и создадовме одличен спој на младост и искуство. Нашите амбиции се јасни – очекуваме да играме најмалку финале“, истакнува тренерот на Работнички.
Клубот во текот на подготовките ќе има можност да ја тестира екипата и против домашни и против странски противници. Пред почетокот на официјалниот дел од сезоната се закажани вкупно девет контролни натпревари.
„Закажавме девет пријателски натпревари, со домашни и странски екипи, што ќе ни ја дадат вистинската слика за квалитетот и подготвеноста на тимот пред почетокот на сезоната. Очекувам максимално залагање, дисциплина и посветеност од секој кошаркар“, дополнува Мирковски.
Со задржан костур, неколку нови имиња и комбинација на младост и искуство, Работнички ќе се обиде да направи чекор напред во однос на минатата сезона. Амбицијата е јасна – борба за финале и постепено враќање на клубот на позициите кои традиционално му припаѓаат.
За Мирковски ова ќе биде уште една сезона во богатата тренерска кариера, но и нов предизвик со Работнички – клубот кој има амбиција повторно да биде на врвот на македонската кошарка.


