Никола Јокиќ повторно покажа дека на кошаркарскиот терен гледа нешто што за другите е невидливо. Српскиот центар приреди вистинско шоу против Лос Анџелес Лејкерс, а едно негово додавање зад грб беше потегот за кој зборува целата кошаркарска јавност.
Денвер нагетс славеше со 121-106, но покрај победата, во фокусот се најде и магијата на Јокиќ, кој уште еднаш потврди дека не мора да скока највисоко или да биде најбрз за да доминира на теренот.
Во една брза акција, по додавањето од Џамал Мареј, Јокиќ ја презеде топката во движење, а потоа без да ја погледне својата цел испрати совршено додавање зад грб. Одбраната на Лејкерс остана целосно затечена, а Тревон Брејзил ја искористи подарената можност за атрактивно забивање.
JOKIĆ BEHIND-THE-BACK DIME 🔥 What a pass from half-court in transition! https://t.co/50f7r35sS4
— NBA (@NBA) October 17, 2026
Потегот експресно се прошири на социјалните мрежи, а го сподели и официјалниот профил на НБА-лигата. Уште еднаш, Јокиќ докажа дека неговата најголема сила не е само во поените и скоковите, туку и во неверојатната способност да ја прочита играта пред сите останати.
Српскиот ас го заврши натпреварот со 17 поени, осум асистенции, шест скока и две украдени топки. Џамал Мареј додаде 21 поен и шест асистенции, додека кај Лејкерс најефикасен беше Остин Ривс со 19 поени. Лука Дончиќ постигна 15 поени за 19 минути игра, дополнети со четири скока и две асистенции.
Денвер така го затвори подготвителниот период со победа, а Јокиќ испрати јасна порака пред стартот на сезоната: кога топката е кај него, дури и невозможните додавања стануваат реалност.


