Македонскиот репрезентативец Ненад Димитријевиќ одигра одличен натпревар во дресот на Арис, кој славеше убедлива победа од 74-57 над Маруси во третото коло од грчкото првенство.
Солунскиот тим го скрши отпорот на противникот во второто полувреме, а нашиот плејмејкер имаше важна улога во налетот што го одлучи победникот.
Димитријевиќ го заврши дуелот со 14 поени и шест скока, потврдувајќи дека станува сè поважен дел од играта на грчкиот клуб. Македонецот беше меѓу играчите кои го одржуваа Арис во контрола во клучните моменти, кога гостите се обидуваа да се вратат во натпреварот.
Арис имаше предност од 37-28 на полувремето, но Маруси успеа да се доближи на само четири поени разлика. Токму тогаш домаќините одговорија со подобра игра во нападот, а Димитријевиќ погоди во важен момент за да го прекине налетот на противникот. Потоа Мат Морган ја презеде главната улога и со серија поени му помогна на Арис да се одлепи на убедливи 60-43 по третата четвртина.
Во последниот период солунскиот состав рутински ја зачува предноста и стигна до вториот триумф во шампионатот.
Најефикасен во победничкиот тим беше Морган со 22 поени, додека Димитријевиќ заврши како втор стрелец на Арис. Кај Маруси, Џордан Вокер постигна 18 поени, а Силвио Де Соуза забележа дабл-дабл со 12 поени и 11 скока. Со овој триумф, Арис има две победи и еден пораз по три одиграни кола, додека Маруси сè уште ја бара првата победа во сезоната.


