Македонскиот репрезентативец Виктор Ташовски продолжува со добрите настапи во дресот на Дубровник, откако втор натпревар по ред постигна двоцифрен број поени во хрватското првенство.
Сепак, неговиот тим не успеа да стигне до победата, па на домашен терен загуби од Кварнер со 81-91.
Ташовски го заврши натпреварот со 11 поени, придонесувајќи во нападот на домашниот состав, кој не најде решение за расположениот ривал од Риека. За македонскиот кошаркар ова е втор последователен натпревар на кој ја минува границата од десет поени, откако минатата недела против Забок постигна 25.
Кварнер, предводен од тренерот Славен Римац, одигра цврст и борбен натпревар и ги искористи своите можности за да стигне до значајна победа на гостински терен. Најефикасен во победничкиот состав беше Лука Крајновиќ со 16 поени и шест асистенции, додека Томислав Јурај Вучковиќ постигна 14 поени. Поранешниот кошаркар на Дубровник, Јосип Батиниќ, го заврши мечот со 15 поени.
Кај домаќините, најдобар стрелец беше Петар Дубељ со 18 поени и седум асистенции. Марко Лончовиќ оствари дабл-дабл учинок од 12 поени и 11 скока, додека Дејвид Павин додаде 14 поени. Покрај Ташовски, двоцифрен учинок имаше и Лукша Андриќ со 11 поени.
Дубровник сега ќе се насочи кон следниот предизвик, гостувањето кај Дубрава во Загреб, каде што ќе се обиде да се врати на победничкиот пат. За Ташовски, пак, ова ќе биде нова можност да ја продолжи серијата на добри офанзивни настапи.


