Шеј Гилџес Александер се подготвува за нова историска мисија во НБА лигата. Ѕвездата на Оклахома Сити Тандер ќе се обиде да го повтори подвигот што последен пат беше остварен пред цели четири децении – освојување на три последователни признанија за најкорисен играч (МВП).
Во досегашната историја на НБА, само тројца кошаркарски великани успеале да ја освојат наградата за МВП три сезони по ред. Тоа им пошло од рака на Бил Расел, Вилт Чемберлен и Лери Бирд, кој беше последниот со ваков подвиг, во периодот од 1984 до 1986 година.
Во изминатите 40 години, бројни легенди како Мајкл Џордан, Коби Брајант, Леброн Џејмс, Меџик Џонсон и Карим Абдул-Џабар доминираа во најсилната кошаркарска лига во светот, но ниту еден од нив не успеа да стигне до три последователни МВП-признанија.
Гилџес Александер веќе се наметна како еден од најдоминантните играчи во современата кошарка. Во последните две сезони добиваше повеќе од 75 проценти од гласовите за првото место во изборот за МВП, а неговиот просек од 32 поена по натпревар во тој период дополнително ја потврдува неговата индивидуална доминација.
Многу ќе зависи и од резултатите на Оклахома Сити. Ако Тандер повторно се вмешаат во борбата за врвот, Гилџес Александер ќе има силни аргументи во трката за најпрестижното индивидуално признание во регуларниот дел од сезоната. Вообичаено, играчите што ги предводат најуспешните екипи имаат сериозна предност во оваа конкуренција.
Но, евентуалната трета МВП титула би имала и интересна финансиска последица за канадскиот кошаркар. По претходните две признанија, тој ги почестил соиграчите со скапи подароци, меѓу кои луксузни часовници, капути од „Барбери“ и други вредни изненадувања.
Ако повторно биде прогласен за најкорисен играч, соиграчите на Гилџес Александер веројатно повторно ќе имаат причина за славење – и можеби уште едно скапо изненадување од својата најголема ѕвезда.


