Возбудувањата во кошаркарската Суперлига продолжуваат со натпреварите од петтото коло, кое носи неколку интересни пресметки и можност за промени на табелата.
Во центарот на вниманието ќе биде Работнички, кој по одличниот почеток на сезоната ќе се обиде да ја продолжи победничката серија и да го задржи максималниот ефект.
Тимот од Градски парк досега е единствен со четири победи од исто толку натпревари и заслужено е на врвот на табелата. Следниот предизвик ќе биде гостувањето кај Скопје, екипа која ќе сака да ја искористи домашната предност и да му го нанесе првиот пораз на лидерот. Натпреварот е на програмата денеса од 18:30 часот во „Јане Сандански“.
Интересно ќе биде и во Кавадарци, каде што Тиквеш ќе го пречека ТФТ. Домашниот состав има една победа по четири кола, додека скопјани се на половичен учинок и ќе бараат нов триумф за приклучок кон горниот дел од табелата. Ако успее да слави, тоа ќе биде прв гостински триумф за ТФТ оваа сезона.
Саботната програма ќе ја отворат ГКК Штип и Струмица, кои ќе се сретнат од 17:30 часот во спортскиот центар „Џексон“. За штипјани ова е нова можност да стигнат до првата победа во сезоната, додека гостите ќе се обидат да го подобрат досегашниот биланс.
Неделата носи две пресметки со посебна тежина. Актуелниот шампион МЗТ Скопје Аеродром ќе го пречека Пелистер од 14 часот во СЦ „Јане Сандански“. Аеродромци имаат три победи и еден пораз, додека битолчани досега забележаа две победи и два неуспеха. Двата тима имаат високи амбиции, па овој дуел може да биде важен показател за нивната форма во продолжението од првенството.
Во Куманово, пак, МКК Куманово ќе се соочи со Кожув. Гевгеличани имаат три победи и се веднаш зад водечкиот Работнички, па ќе се обидат да ја продолжат добрата серија на гостувањето кај кумановци.
РАСПОРЕД НА НАТПРЕВАРИТЕ
Сабота, 31 октомври
- 17:30 часот: ГКК Штип – Струмица
- 18:30 часот: Скопје – Работнички
- 18:30 часот: Тиквеш Голден Игл – ТФТ
Недела, 1 ноември
- 14:00 часот: МЗТ Скопје Аеродром – Пелистер
- 18:00 часот: МКК Куманово – Кожув


