Кошаркарите на Работнички продолжуваат со перфектниот старт на новата сезона во Суперлигата. Тимот од „Градски парк“ ја забележа и петтата последователна победа, откако во градското дерби, одиграно во салата на СЦ „Јане Сандански“, славеше над Скопје со 89-79.
Домашниот состав подобро го отвори натпреварот и по првите десет минути имаше минимална предност од 20-17. Работнички возврати во вториот период, кога направи резултатски пресврт и поведе со 24-23. По тројката на Николов гостите се одлепија на пет поени (33-28), но Скопје не дозволи противникот да се одвои. Домашните во 19. минута стигнаа до ново израмнување (40-40), но во завршницата од полувремето Работнички постигна пет поени во низа и на паузата замина со водство од 45-40.
Клучната разлика беше направена по одморот. Работнички заигра многу посигурно, ја презеде целосната контрола и со одлична серија во третата четвртина стигна до двоцифрена предност. Во 27. минута на семафорот стоеше убедливи 67-52 за гостите, кои до крајот на периодот ја зачуваа предноста од 15 поени (75-60).
Во последните десет минути Работнички го намали ритамот, што му овозможи на Скопје да ја ублажи негативата и да избегне поубедлив пораз. Сепак, немаше неизвесност околу конечниот исход, па „црвено-белите“ заслужено се радуваа на победа од 89-79.
Апсолутен лидер во победничкиот состав беше Роберт Рикиќ, кој одигра извонреден натпревар со 29 поени и осум скока. Дарин Говенс запиша 12 поени, осум асистенции и пет скока, додека Ефремовски реализираше 10 поени. Робев и Николов придонесоа со по девет поени. Кај Скопје, Колин Паркер беше најефикасен со 23 поени и осум скока, Џонс постигна 18, а Миловановиќ го заврши натпреварот со 10 поени.
Работнички останува единствен со максимален ефект на врвот на табелата. По пет одиграни кола, избраниците на тренерот Владимир Мирковски имаат пет победи од пет натпревари, додека Скопје останува на една победа и четири порази.


