Црвена Звезда и Партизан добија сериозни дисциплински санкции од Евролигата поради инцидентите на вечитото дерби, одиграно во седмото коло од елитното европско натпреварување.
Многу потешко помина Црвена Звезда, која ќе мора да плати вкупно 115.000 евра, но и да се соочи со дополнителна казна – нејзините навивачи нема да можат да го бодрат тимот на следните пет гостувања во Евролигата.
Тоа значи дека избраниците на Ибон Наваро ќе играат без поддршка од своите приврзаници на гостувањата кај Олимпијакос, Реал Мадрид, Милано, Барселона и Фенербахче. Последниот од овие натпревари е закажан за 3 декември, а белградскиот состав повторно ќе може да смета на своите навивачи на гостувањето кај Валенсија на 10 декември.
Причина за санкциите се повеќе прекршувања на дисциплинските правила, меѓу кои инциденти што ја загрозиле безбедноста, навредливи скандирања, употреба на ласери, фрлање предмети на теренот и влегување на навивачи на паркетот. Дополнителни 7.000 евра белградскиот клуб ќе плати поради навредливото скандирање на своите навивачи на натпреварот против Хапоел Тел Авив, одигран во второто коло.
Ниту Партизан не помина без последици. „Црно-белите“ се казнети со 49.000 евра, а добија и условна санкција за ограничување на капацитетот на салата на домашните натпревари доколку се повторат слични инциденти. Засега не е објавено колкав дел од трибините би бил затворен во случај на нов прекршок.
Така, големото белградско ривалство доби и сериозна дисциплинска епилог, а најголемата цена за случувањата на теренот и трибините ќе ја плати Црвена Звезда, која во следните пет европски гостувања ќе биде лишена од поддршката на своите навивачи.


