Реал Мадрид се соочува со нов сериозен проблем пред продолжението на сезоната во Евролигата, откако официјално ја потврди повредата на аргентинскиот плејмејкер Факундо Кампацо. Медицинските прегледи покажале повреда на бицепс феморисот, односно мускулот на задната ложа на левата нога.
Кралскиот клуб преку официјално соопштение информираше дека Кампацо ги направил потребните прегледи, по што била констатирана повредата. Засега нема прецизна информација колку долго аргентинскиот репрезентативец ќе биде надвор од терените, а неговата состојба ќе се следи во наредниот период.
Она што е сигурно е дека Кампацо нема да настапи на дуелот против Панатинаикос, а неговото отсуство дополнително ги комплицира плановите на тренерот Педро Мартинез. Шпанскиот стратег веќе има сериозни кадровски проблеми, со оглед на тоа што надвор од комбинација се и Тео Маледон, Габриел Дек, Микаел Јантунен и Усман Гаруба.
„Има мускулна повреда на ногата. Не сметаме на него и немам дополнителни информации за периодот на опоравување“, изјави тренерот на Реал.
Аргентинецот е еден од најважните играчи во организацијата на играта на Реал, па неговото отсуство ќе отвори дополнителен простор за одговорност кај останатите бекови, пред сè Андрес Фелиз и Серхио Љуљ.
Реал така влегува во исклучително тежок период од сезоната, со проблеми на неколку позиции и неизвесност околу враќањето на повредените кошаркари. Сега сите погледи во Мадрид се насочени кон опоравувањето на Кампацо и можноста аргентинскиот организатор на играта да се врати пред важниот дуел со Црвена звезда.


