Македонскиот репрезентативец Теодор Симиќ одигра уште еден фантастичен натпревар во НЦАА и беше најзаслужен за втората победа на Универзитетот Тексас-Арлингтон.
Нашиот центар постигна 24 поени, со што беше најефикасен во триумфот над Портланд од 89-85, во рамките на турнирот „Аутригер Рејнбоу Класик“ на Хаваи.
Дополнителна тежина на остварувањето на Симиќ му дава фактот што тој не беше стартер, туку повторно влезе од клупата. Тоа, сепак, не го спречи да биде главен двигател во нападот на својот тим. За 25 минути на паркетот постигна 24 поени, реализирајќи девет од 17 обиди од поле, вклучувајќи четири тројки од седум шута, а додаде и пет скока.
Особено импресивно беше неговото издание во првото полувреме, во кое постигна дури 20 поени и погоди четири тројки. Со неговата офанзивна продукција, Тексас-Арлингтон ја задржа предноста на паузата, кога резултатот гласеше 46-43.
Портланд не се предаде и во вториот дел успеа да го преземе водството. На нешто помалку од две минути до крајот, противникот поведе со 85-84 и се чинеше дека може да приреди пресврт. Сепак, Маверикс одговорија во клучните моменти. Миер Паноам погоди две слободни фрлања за ново водство, а Нико Бундало со дополнителни поени и важна украдена топка помогна да се обезбеди победата.
За Тексас-Арлингтон ова е втора победа во исто толку натпревари од почетокот на сезоната. Симиќ, пак, продолжува во одличен ритам: по 16 поени и девет скока на отворањето против Норт Тексас-Далас, сега следуваше уште поефикасно издание со 24 поени против Портланд.
Следниот предизвик за македонскиот кошаркар и неговиот тим е дуелот со домаќинот Хаваи, закажан утре вечер.


