Поразот од Романија на стартот од претквалификациите за Евробаскетот во 2029 година не го поколеба селекторот Виктор Петровски во вербата во новата генерација македонски кошаркарки.
И покрај убедливите 73-52 во корист на домашната селекција, тој го истакна односот, борбеноста и пожртвуваноста што неговите избранички ги покажале во текот на натпреварот. Особено охрабрувачка беше реакцијата на Македонија по лошото отворање на средбата. По првата четвртина, во која постигна само четири поени, а на полувремето имаше негатива од 27 поени, нашата селекција одигра значително подобро во продолжението. Третиот период го доби со 21-10 и покажа дека може да одговори на предизвикот кога ќе успее да ја пронајде својата игра.
Токму карактерот прикажан во второто полувреме е причината поради која Петровски им упати честитки на кошаркарките, без оглед на конечниот резултат.
„Сакам да им честитам на девојките за начинот на кој се бореа и за карактерот што го покажаа. И покрај тешката прва четвртина и негативата во која се најдовме, не се предадоа ниту за момент. Продолжија да веруваат, да се борат за секоја топка и даваа максимум до последната секунда.
Покажаа огромна енергија, пожртвуваност и вистински тимски дух. Навистина сум горд на нив, на нивниот однос кон дресот и на желбата што ја покажаа на теренот. Мислам дека токму ваквиот карактер, заедништво и борбеност се основата врз која треба да ја градиме оваа репрезентација. Резултатот овојпат не беше во наша корист, но девојките заслужуваат искрени честитки за прикажаното“, рече Петровски по натпреварот.
Женската кошаркарска репрезентација веќе в сабота ја очекува нов натпревар од претквалификациите, против Естонија во Штип.


