Македонскиот репрезентативец Ненад Димитријевиќ одигра уште еден одличен натпревар во дресот на Арис, кој приреди вистинска кошаркарска демонстрација на гостувањето кај Рошток и славеше со убедливи 110-79 во четвртото коло од Еврокупот.
Димитријевиќ беше еден од најзаслужните за убедливиот триумф на грчкиот состав, завршувајќи го натпреварот со 17 поени, четири асистенции и три загубени топки. Македонскиот плејмејкер погоди три тројки од четири обиди и уште еднаш покажа колку е важен за организацијата на играта на тимот од Солун.
Арис уште од самиот почеток наметна висок ритам и најави дека во Германија е дојден по цел плен. Гостите ја добија првата четвртина со 29-20, а во вториот период целосно ја презедоа контролата. Со серија од 11-0 се одлепија на убедлива предност, па на паузата имаа водство од 58-37.
Ниту продолжението не донесе промена на сликата на теренот. Арис продолжи да доминира во нападот, ја зголемуваше предноста и во еден момент стигна и до повеќе од 30 поени разлика. На крајот, гостите рутински ја потврдија победата од 110-79.
Покрај Димитријевиќ, одличен настап имаше и Џеремаја Робинсон-Ерл со 21 поен и десет скока, додека Мет Морган постигна 20 поени. Василис Толјопулос додаде 16 поени за убедливиот триумф на грчкиот тим.
Со оваа победа Арис го задржа совршениот биланс во Еврокупот и стигна до четвртиот триумф во исто толку натпревари. Следниот предизвик за тимот на Василис Спанулис ќе биде домашниот дуел со Олимпија, закажан за 28 октомври.


