Летонската кошаркарска суперѕвезда Кристапс Порзингис се огласи по шпекулациите за неговата здравствена состојба, откако неизвесноста околу неговото отсуство од терените предизвика бројни реакции во јавноста.
Центарот на Голден Стејт јасно порача дека се наоѓа во рацете на медицински стручњаци и дека постепено се чувствува подобро.
Порзингис не беше дел од подготовките на Голден Стејт Вориорс за новата сезона, а клубот потврди дека кошаркарот ќе остане надвор од терените на неопределено време поради здравствен проблем. Засега нема прецизни информации за тоа од што точно боледува, ниту кога би можел да се врати на тренинзите и натпреварите.
Hello people, I’m working with doctors and experts to figure out how to be fully back to good health asap. Honestly, I’m getting better and better. I just have to stay patient, and I believe I’ll be feeling great again soon. It has definitely been frustrating dealing with some health stuff that you can’t exactly pinpoint, on top of injuries throughout my career, so it has added up for sure, but we will get through it 💪🏼 Health is wealth. Thank you for all the support 🙏🏼
— Kristaps Porzingis (@kporzee) October 14, 2026
Откако отсуството на Летонецот предизвика различни шпекулации на социјалните мрежи, тој реши лично да се обрати до јавноста. Порзингис објасни дека работи со лекари и специјалисти за да ја врати целосната здравствена состојба, а воедно испрати порака до оние што се обидуваат да му поставуваат дијагнози преку интернет.
„Здраво на сите, работам со лекари и специјалисти за да најдам начин што е можно побрзо целосно да закрепнам. Искрено, се чувствувам сè подобро и подобро. Само треба да бидам трпелив и верувам дека наскоро повторно ќе се чувствувам одлично“, порача кошаркарот.
Тој призна дека неизвесноста околу здравствените проблеми му претставува дополнителна фрустрација, особено по повредите со кои се соочувал во текот на кариерата.
„Фрустрирачки е да се справуваш со здравствени проблеми што не можеш точно да ги дефинираш, покрај сите повреди што ги имав во кариерата. Сето тоа се насобра, но ќе го надминеме. Здравјето е богатство. Ви благодарам на сите за поддршката“, додаде Порзингис.
Потоа директно се осврна на гласините што се ширеа на интернет, отфрлајќи ги тврдењата дека има ХИВ.
„Ги ценам сите интернет-доктори што се обидуваат да поставуваат дијагнози и да помогнат, но јас сум во најдобри раце. Затоа, сите можете да се опуштите – немам ХИВ, ниту СИДА“, напиша Порзингис на социјалните мрежи.
Во меѓувреме, Голден Стејт потврди дека центарот повторно се приклучил на клубот и имал средба со генералниот менаџер Мајк Данливи и директорот за здравје и физичка подготвеност Рик Челебрини. Сепак, засега не е познато кога ќе може да се врати на тренинзите и натпреварите.
За Вориорс, отсуството на Порзингис е значаен проблем пред почетокот на сезоната, но приоритет останува неговото целосно закрепнување. Кошаркарот, пак, уверува дека се чувствува подобро и дека со помош на медицинскиот тим работи на враќање во посакуваната форма.


