Сè поголем е јазот меѓу Томас Вокап и Олимпијакос, а спорот меѓу двете страни доби нова димензија откако во јавноста се појавија детали од тужбата на кошаркарот пред БАТ – Меѓународниот арбитражен трибунал за кошаркарски спорови при ФИБА.
Вокап сака да го напушти клубот од Пиреја, но Олимпијакос не му дозволува да замине без соодветно обесштетување. Американецот со грчко државјанство смета дека сумата што клубот ја бара за негов трансфер е превисока, особено во однос на неговата актуелна плата.
Поради тоа, Вокап побарал заштита на своите интереси пред БАТ и се обидува да го раскине договорот со грчкиот гигант. Во меѓувреме, тој не се појави на првите тестирања на екипата пред новата сезона, туку индивидуално тренира во Њујорк. Олимпијакос јавно реагираше и побара од својот играч да се извини за постапката.
Но, според информациите што се појавија, во тужбата постои уште еден аргумент со кој Вокап го бара раскинот на договорот.
Станува збор за 9.000 евра, сума која клубот му ја задржал од заработката поради оштетување на неговиот автомобил на крајот од минатата сезона. Вокап не ја признава ниту штетата ниту обврската да го плати тој износ и смета дека парите неправедно му биле задржани. Токму овој случај со автомобилот е наведен како дополнителна причина во постапката пред БАТ, преку која Вокап се обидува да стане слободен играч.
Од друга страна, Олимпијакос инсистира дека нема намера да го пушти искусниот плејмејкер без договор и официјално демантираше дека поставил конкретна сума за негово заминување.
Така, спорот кој првично изгледаше како несогласување околу иднината на Вокап во Пиреја, сега прерасна во правна битка во која се вмешани и финансиски детали поврзани со оштетен автомобил.


