Денвер Нагетс вечерва ја започнува новата сезона со дуел против Оклахома Сити Тандер, а НБА лигата веќе ги истакна рекордите што Јокиќ би можел да ги достигне или надмине во текот на натпреварувачката година.
Најголемото внимание е насочено кон трката за трипл-даблови. На Јокиќ му недостигаат уште 12 трипл-дабла за да го надмине Расел Вестбрук според бројот на вакви ефекти во регуларниот дел од сезоната. Доколку продолжи со своето препознатливо темпо, историскиот момент би можел да се случи уште до крајот на 2026 година.
Српскиот центар е блиску и до други значајни достигнувања. Му недостига уште еден трипл-дабл за да го преземе првото место кога заедно се пресметуваат регуларниот дел од сезоната и плејофот, а со уште два вакви настапа би станал вториот кошаркар во историјата со повеќе од 200 трипл-даблови во регуларниот дел од сезоната.
Но, тие не се единствената категорија во која Јокиќ може да влезе во елитното друштво.
Леброн Џејмс засега е единствениот кошаркар во историјата на НБА кој има повеќе од 20.000 поени, 10.000 скокови и 7.000 асистенции. Јокиќ има можност да стане вториот играч со таков статистички учинок, но пред него има сериозна задача. Според објавените податоци, му недостигаат уште 1.991 поен, 1.023 скока и 920 асистенции за да ги достигне потребните граници. Минатата сезона српскиот ас одигра 65 натпревари поради повреда, на кои забележа 1.799 поени, 836 скока и 697 асистенции.
Ако остане здрав и продолжи да игра на своето препознатливо ниво, Јокиќ би можел да направи голем чекор кон уште едно историско достигнување.
Новата сезона така носи двоен предизвик за центарот на Денвер: да го предводи својот тим кон највисоките цели и истовремено да продолжи да ги поместува границите на НБА-кошарката.


