Рокот за трејдови во НБА се приближува до крајот (5 февруари), но досега немаше поголеми зделки. Минатата сезона, Далас неочекувано го испрати Лука Дончиќ во Лос Анџелес Лејкерс, во замена за Ентони Дејвис, предизвикувајќи вистински земјотрес во најсилната лига во светот.
Овојпат, Јанис Адетокунбо би можел да го украде шоуто. Не толку ненадејно и како што стојат работите, не без негово знаење (како што беше случајот со Дончиќ), бидејќи според најновите информации, тој е подготвен да се раздели од Милвоки Бакс. Тимот од Висконсин се мачи оваа сезона, Јанис моментално е повреден, Бакс се далеку од плејофот, а камоли од борбата за титулата, а Адетокунбо постојано го изразува своето незадоволство. ESPN тврди дека тој со недели му сугерира на клубот дека можеби е време да се разделат.
Сега најважното прашање е дали би можел да го крене сидрото идната недела или да почека до следното лето? Очигледно, двете опции се во игра и Милвоки е подготвен да ги слушне понудите. Новинарот на ESPN, Тим Мекмахон, истакна дека Хјустон Рокетс нема да се обиде да го доведе оваа сезона, но дека сакаат да почекаат до летото, што ги остава Мајами Хит како главен фаворит за трејд со Бакс.
Тимот од Флорида игра добро оваа сезона, речиси е сигурно дека повторно ќе играат плејоф, но малкумина можат да ги видат во борбата за тронот на Истокот. Сепак, доаѓањето на еден од најдобрите играчи во светот би го променило тоа за миг. Иако нема прецизни информации за тоа што Мајами би можел да му понуди на Милвоки, кој секако сака млади играчи и пикови во замена за Јанис, во американските медиуми се нагласува дека Хит имаат доволно ресурси за да ја завршат работата. Поседуваат пикови, но и имаат неколку многу талентирани играчи во своите редови.
Заклучокот е дека Бакс не брзаат, оваа сезона е практично отпишана, па сега главното прашање е колку Мајами е решен да ја победи конкуренцијата и да го пресели Адетокунбо во своите редови оваа зима. Јанис секако нема да игра до крајот на февруари, можеби и почетокот на март, а потоа останува уште еден месец до крајот на основниот дел од сезоната.


