Серијата од девет победи на Лос Анџелес Лејкерс заврши ноќеска откако тимот од Калифорнија загуби на гостувањето кај Детроит со 110-113.
Херој на најдобриот тим на Истокот беше Данис Џенкинс кој постигна 30 поени, што е негов најдобар ефект во кариерата, а шест од нив реализира во последните 34 секунди. Станува збор за кошаркар кој во НБА влезе како недрафтуван, нема голема минутажа, а неговиот просек изнесува осум поени по натпревар. Ова беше четврта победа по ред за Пистонс и седма во последните осум меча.
Заедно со Џенкинс, Џејлен Дурен исто така се истакна за победничкиот тим со 20 поени и десет скока. Лука Дончиќ со 32 поени и Остин Ривс со 24 не успеаја да го спречат поразот на Лејкерс. Леброн Џејмс го заврши натпреварот со 12 поени, десет асистенции и девет скока, а не постигна ниту еден поен во првото полувреме. Дончиќ доби дозвола да игра, откако НБА ја поништи неговата 16. техничка грешка во сезоната, што инаку ќе значеше автоматска суспензија од еден натпревар.
Лејкерс губеа со 16 поени разлика на почетокот на третата четвртина, но успеаја да се вратат во игра. На девет минути пред крајот, резултатот беше израмнет на 91-91, но Пистонс одговорија со серија од 10-3 и повторно се одвоија. Сепак, гостите не се предадоа и го израмнија резултатот на 105-105 со три слободни фрлања од Лук Кенард, на нешто помалку од три минути пред крајот.
Последната минута донесе драма. Диандре Ејтон погоди две слободни фрлања за да им донесе на Лејкерс водство од 108-107 на 40 секунди пред крајот. Џенкинс веднаш одговори на ист начин за да им даде водство на Детроит, а потоа Остин Ривс погоди скок-шут за повторно да им донесе водство на домашните (110-109).
Клучниот момент се случи кога Џенкинс повторно погоди, а по промашувањето на Дончиќ, тој погоди уште две слободни фрлања за 113-110, на девет секунди пред крајот. Во последниот напад, Дончиќ се обиде да се избори за продолжение со тројка, но неговиот удар од тешка позиција не беше прецизен.
РЕЗУЛТАТИ
Детроит – ЛА Лејкерс 113-110
Мајами – Сан Антонио 111-136
Орландо – Индијана 126-128
Филаделфија – Оклахома 103-123
Атланта – Мемфис 146-107
Чикаго – Хјустон 132-124
Јута – Торонто 127-143
Далас – Голден Стејт 131-137
Портланд – Бруклин 134-99
ЛА Клиперс – Милвоки 129-96


