Бен Симонс доживеа нов тежок удар во кариерата, откако кошаркарот на Сакраменто Кингс ја скина Ахиловата тетива на десната нога за време на тренинг, поради што ќе ја пропушти целата сезона 2026/27 во НБА-лигата.
Повредата доаѓа непосредно пред почетокот на новата сезона, во момент кога австралискиот кошаркар се подготвуваше за враќање на терените.
Триесетгодишниот Симонс потпиша едногодишен договор со Сакраменто во септември, надевајќи се дека ќе ја оживее кариерата по долгата пауза предизвикана од проблемите со грбот. Магнетната резонанца ја потврди сериозноста на повредата, а кошаркарот ќе мора да биде подложен на операција.
Симонс последниот официјален натпревар во НБА го одигра на 29 април 2025 година, во дресот на Лос Анџелес Клиперс против Денвер Нагетс, во првото коло од плејофот. По таа средба не настапи во сезоната 2025/26, која ја пропушти поради физичките проблеми и рехабилитацијата.
Првиот пик на НБА-драфтот во 2016 година и трикратен учесник на Ол-стар натпреварот се надеваше дека со Сакраменто ќе добие нова шанса да се врати на препознатливото ниво. Сепак, најновата повреда повторно ги одложува неговите планови за враќање во најсилната кошаркарска лига во светот.
Симонс во досегашната НБА-кариера настапуваше за Филаделфија 76ерс, Бруклин Нетс и Лос Анџелес Клиперс, а во сезоната 2017/18 ја освои наградата за најдобар дебитант во лигата.


