Олимпијакос се соочува со сериозен проблем, откако остана без најголемото летно засилување.
Доминиканскиот бек Жан Монтеро беше опериран поради повреда на менискусот и, според најновите информации од грчките медиуми, го очекува пауза од околу шест месеци.
Ова е голем удар за тренерот Јоргос Барцокас, кој во Монтеро доби важна опција во бековската линија. Кошаркарот имаше одличен почеток на сезоната, но проблемите со коленото го оддалечија од теренот, а конзервативниот пристап на лекување не го донесе посакуваниот резултат.
Клубот потврди дека Монтеро бил подложен на хируршка интервенција за санирање на повредата на латералниот менискус на левото колено. Во официјалното соопштение е наведено дека се очекува да отсуствува шест месеци.
Интересно е што првичните процени беа многу пооптимистички. Се разгледуваше можноста за артроскопска интервенција и пауза од околу еден месец, но дополнителните информации покажаа дека проблемот е посериозен од очекуваното. Претходно бил применет и третман со плазма богата со тромбоцити, но без посакуван ефект.
Отсуството на 23-годишниот бек е особено болно за грчкиот гигант ако се земе предвид неговиот досегашен придонес. На шест натпревари во Евролигата сезонава Монтеро имаше просек од 15,5 поени, 4,5 асистенции и 3,5 скока, со дополнителни 1,2 украдени топки за нешто помалку од 24 минути на паркетот.
Олимпијакос така останува без еден од своите најпродуктивни играчи во период од шест месеци, што претставува сериозен предизвик за Барцокас и неговата екипа во продолжението од сезоната. Во најдобар случај, Монтеро би се вратил за завршниот турнир од Евролигата, ако Олимпијакос успее да обезбеди пласман на него.


