МКК Куманово продолжува да го гради составот со високи амбиции, а најновото име во ростерот е македонскиот репрезентативец Адем Мекиќ.
Искусниот бек се враќа во Куманово и воопшто во македонската кошарка по интернационалниот период во кој настапуваше за хрватскиот Задар, а неговото доаѓање претставува сериозно засилување за тимот кој во последниот период покажа дека има амбиции да се вмеша во борбата за највисоките позиции.
Мекиќ кариерата ја започна во Вардар, а во периодот од 2014 до 2017 година беше дел од МЗТ Скопје. Со „металците“ настапуваше во АБА-лигата и Еврокупот и освои три шампионски титули и два Купа на Македонија. Потоа следуваше периодот во Куманово, а играше и за Пелистер и ТФТ. Во сезоната 2019/20 со Пелистер се најде во најдобрата домашна петорка, а на еден натпревар против МЗТ Уни Банка забележа и импресивен трипл-дабл – 21 поен, 12 скока и 11 асистенции.
Со Задар Мекиќ освои две шампионски титули на Хрватска, во 2023 и 2024 година, а во март годинава повторно се врати во клубот и му помогна на хрватскиот клуб во завршницата на сезоната. Во финалната серија против Цибона имаше и неколку забележителни настапи, меѓу кои и 12 поени, четири скока и две асистенции за само 17 минути во вториот натпревар од финалето.
Мекиќ е и стандарден репрезентативец на Македонија и во последниот период беше меѓу поискусните играчи во составот. Во август годинава имаше значајна улога во победата над Австрија во претквалификациите за Еуробаскет 2029.
МКК Куманово во 2026 година покажа дека сака да биде сериозен фактор во домашната кошарка. Тимот стигна до финалето на Купот на Македонија, каде што загуби од МЗТ Скопје со 70-96, а само неколку месеци подоцна повторно се најде во голем натпревар против истиот ривал. Пред неколку дена беше домаќин на Суперкупот на Македонија и одигра драматичен натпревар против МЗТ, но загуби минимално со 68-70.
Со Мекиќ во составот, можеби и со уште некое засилување во иднина, МКК Куманово ќе се обиде да го освои првиот трофеј во својата историја.


