Грчката кошаркарска репрезентација се најде во исклучително тешка ситуација во квалификациите за Светското првенство 2027.
Грците вчера загубија од Украина со 76-82, со што дополнително си ја искомплицираа борбата за пласман на Мундобаскетот.
По овој пораз, Грција е последна во групата со 10 бода, а до крајот на квалификацискиот циклус ќе мора да брка резултати доколку сака да ги задржи шансите за пласман. Поразот од Украина беше особено болен бидејќи Грците имаа можност со победа да направат значаен чекор кон подобра позиција на табелата. Наместо тоа, Украина освои исклучително важни бодови, додека Грција остана на дното.
Конкуренцијата во групата е жестока, а Грците немаат многу простор за нови киксови. Секој следен натпревар ќе има огромно значење во борбата за местата кои водат во следната фаза и на крајот кон Светското првенство.
Следниот предизвик е уште потежок – Шпанија. Грција ќе мора да бара позитивен резултат против еден од фаворитите во групата доколку сака да ја поправи својата позиција.
Ако Грците не успеат да се извлечат од последното место и да обезбедат пласман на Мундобаскетот, колатерална штета ќе биде и Јанис Адетокунбо.
Ѕвездата на Милвоки Бакс, кој не игра за националниот тим во овие квалификации, би можела да остане без можност да ја предводи Грција на Светското првенство иако лично би можел да биде подготвен за настап. За една од најголемите кошаркарски ѕвезди во светот, тоа би бил огромен удар.
Затоа Грција влегува во финишот од квалификациите под голем притисок. Последното место на табелата е сериозен аларм, а доколку ситуацијата не се промени, последиците би можеле да бидат многу поголеми од еден неуспешен квалификациски циклус.
Во слична ситуација се наоѓа и Лука Дончиќ кој поради неуспехот на своите соиграчи, слично како Адетокунбо, може да не настапи на Светското првенство во Катар идната година.


